पर्यटनका सनसनी समाचार

नेपालका पर्यटन समाचारहरुले संसारमा कति सम्म असर गर्छ भन्ने हेक्का समेत नराखी सनसनी पूर्ण समाचार सम्प्रेषण गर्ने सम्बन्धित पत्रकारहरुलाई सम्बोधन गर्ने लक्ष्य लिएर यो लेख लेख्ने जमर्को गरेको छु | हुन त मैले कुनै पत्रकारिता सम्बन्धित तालिम लिएको छैन तर पर्यटनको मर्म भने बुझेको छु है साथीहरु ! कृपया माइण्ड नगर्नु होला |

पर्यटनको मर्म नबुझीकन पर्यटन पत्रकार भनेर हिड्ने पत्रकारहरुले पीत पत्रकारिता नगरोस भन्ने भावनालाई मध्यनजर गरेर मैले जाने बुझेका कुराहरु शेयर गर्न खोजेको मात्रै हो |

कतिपय पत्रकारहरुले हट न्यूज ब्रेक गर्ने नाममा वास्तविकता नै नबुझी झ्याप्पै समाचार फ्लास गरि दिने गर्नाले पर्यटन ब्यबसायमा नराम्रो संग असर गरेको मैले बिगत देखि नै अनुभव गरेको छु | बिगतमा कतिपय व्यावसायिक घरानाहरु संग आबद्धता भएको बेलामा मैल खुलेर बिरोध गर्न नमिल्ने हुँदा चुपचाप बस्न परेको बाध्यता पनि थियो | अहिले परिस्थिति फरक परेको छ |

प्राबिधिक कुराको ज्ञान पटक्कै नहुनाले र अध्ययनमा चासो पनि राख्न नसकेका पत्रुकारहरुले गर्दा नै बास्तबिक पर्यटन पत्रकारहरु समेतलाई बद्नाम हुन परेको छ | भर्खरको उदाहरण यस्तो छ:

हालै एउटा केबलकार प्राबिधिक कारणले केहि समय रोकिन गएको समाचार आयो | यति सनसनी पूर्ण थियो कि मानौ त्यो केबलकार कामै नलाग्ने, संचालकहरु सबै ठग, निकम्मा, ज्यानमारा जस्तै नै गरेर चित्रण गरियो |

म आफै त त्यो स्थानमा थिएन | तर नेपालको एक विशिष्ट पर्यटन संस्था नेपाल एस्सोसियसन अफ टुर एण्ड ट्राभल एजेन्ट्सका अध्यक्ष मधुसुदन आचार्य चाहिं हुनु हुदो रहेछ | पर्यटनमा मेरो पनि सरोकार रहेकोले त्यो समाचारलाई मैले पनि शेयर गरेको थिएं | संचालकहरुको पनि ध्यान जाओस र सिघ्र सुधार गरोस भन्ने शुद्ध मनसायले |

तर NATTA का अध्यक्षज्यूले मेरो शेयरमा त्यो समाचार अतिशयोक्ति रुपले प्रेषित गरीएको भन्ने खबर बुझ्दा, समाचारदाता प्रति खेद प्रकट गर्न मन लाग्यो र दिक्क पनि लाग्यो | समाचार लेख्ने पत्रकारले खबरिवालाको मात्र हवाला दिएर लेखे जस्तो लाग्यो | कमसेकम ब्यबस्थापनको भनाइ पनि सकारात्मंक हिसाबमा राम्ररी महत्वका साथ लेखि दिएको भए राम्रो हुन्थ्यो | एकोहोरो ग्राहकको मात्रै कुरा लेखेर सनसनी फैलाउदा एकछिन त मजा आउला तर कालान्तर सम्म त्यो प्रडक्टमा असर हुनुको साथै त्यसको बिश्वसनियतामा मात्र होइन खबर छाप्ने पत्रिका माथि पनि प्रश्न मात्र उठ्छ | समाधान भने हुँदैन | एक पटकको डर संधैको डर भई प्रकट हुन्छ | त्यसैले समस्या मात्र होइन समाधानका उपाय पनि लेखेर पर्यटनको मर्म र पत्रकारिता धर्म निभाउन पनि प्रयास गर्ने कि?

जय पर्यटन !

भवतु सब्ब मङ्गलम | अस्तु |