सोचाई (Thinking)

नमस्कार साथी ! ओहो कत्ति मोटाउनु भएछ भनेर लुरे मान्छेलाई भन्नु भयो भने त्यो मान्छे मख्ख पर्छ | त्यहि मान्छेलाई ओहो तपाईलाई के भयो हँ ? कस्तो दुब्लाउनु भएको ? मधुमेह भयो कि, टि. बी. लाग्यो कि ? भन्नु भयो भने त्यो बिचरा को दिमाग खराब हुन्छ | त्यसमाथी अरु तीन चार जनाले पनि सबैले दुब्लाएछ, किन हो ? भन्यो भने झन् दिमाग खराब हुन्छ र त्यो बिचराले आफैलाई सोध्न थाल्छ, मन मनै घोत्लिन थाल्छ किन म दुब्लाएको होला ? अलिकति मोटाउन पाए त हुन्थ्यो, भन्ने लाग्न थाल्छ | के थाहा त्यहि मानसिकताले त्यो मान्छे डिप्रेसनमा पनि जान सक्छ | 

फेरी त्यहि मान्छेले आर्को सोंच लिएर, जसले जे भने पनि मलाई के मतलब ? मोटाए पनि दुब्लाए पनि कोहि संग केहि लिनु दिनु छैन भन्ने मानसिकताका साथ सकारात्मक धारणा लिन्छ भने त्यो व्यक्तिलाई केहि पनि फरक पर्दैन | उ सन्तुष्ट नै हुन्छ | 

त्यसै गरि अफिसमा पनि कुनै कर्मचारीलाई तपाइँलाई त केहि पनि आउदैन रहेछ | तपाई को काम गर्ने ढंग नै छैन रहेछ भन्यो भने त्यो कर्मचारीले आफ्नो दिमागनै चलाउन छाड्छ र अर्हाएको काम मात्रै गर्छ | त्यो कर्मचारीले न सुझाब दिन्छ न कुनै काम गर्न अग्रसर नै हुन्छ | न त कुनै विचार नै दिन्छ | यस्ता कर्मचारीहरुको झुण्ड जम्मा गरेर मेरो कम्पनीमा यति धेरै कर्मचारी छन् | यति धेरैलाई मैले रोजगारी दिएको छु भनेर कसैले फुर्ति लगाउने गरेको छ भने त्यो कम्पनिको आयु धेरै हुन्न र कम्पनीले चाहेको नतिजा पनि आउदैन |

अर्को तर्फ कर्मचारीहरुलाई समय समयमा तालिममा सहभागी गराउने अलिकति राम्रो काम गर्ने बित्तिकै सार्बजनिक स्थानमा प्रशंसा गरि दिने प्रोत्साहन दिने गरेमा कर्मचारीहरुको मनोबल बढेर अझ बढी मिहेनत गरेर कम्पनीको फाइदाको लागि काम गर्नु  पर्छ भन्ने भावना जागृत हुन्छ |

ब्यबहारिक बिज्ञानमा कुनै कर्मचारीले काम बिगार गर्यो र गाली गर्नु पर्यो भने एउटा कुनामा लैजाने र सम्झाउने गर्नु पर्छ र राम्रो काम गर्यो भने सबैको अगाडि प्रशंसा गर्नु पर्छ भनिन्छ | तर कतिपय कम्पनीमा भने यसको ठिक बिपरित हुन्छ | कर्मचारी लाई बेस्सरी झाप्न सक्यो भने आफु ठुलो मान्छे बनेको अनुभब गर्छन | जुन एकदम बेठिक सोचाई हो | आ आफ्नो सोचाईमा सुधार गर्ने हो कि ! अस्तु |